ŞEİRLƏR

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Yiyəsiz uşaqların,

tövbəsiz günahların

ahı tutar adamı..

Qapını kəsdirərlər

aramsız bir yağışla,

Biri çörək istəyər,

biri deyər "bağışla".

Birinin əyni yalın,

birinin boynu bükük

Biri qıçın boydadır,

biri başından böyük..

Bir gecədə törəyər

rəhmətindən didərgin,

möhürlənmiş kölgələr,

Bir vaxt kimsəsiz qalan,

bir vaxt unudulan ah,

bu gün qapın önündə

fəryad eyləyən günah..

Anasız, atasızdır..

Vur özünü gah sağa,

Vür özünü sola sən,

Öz yetim günahına

necə özgə olasan?

Yiyə durmasan əgər

bu iki kimsəsizə,

Atanı da satarlar,

ananı da ucuza..

(oktyabr 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Kürün, Arazın adı

Xəzərə çatanacan,

Sahillərdən sahilə

özün atanacandır..

Ay bir gecəlikdisə,

Günəş batanacandır..

Hər şeyin öz vaxtı var,

Başını qoy yastığa,

çətin yatanacandır..

(sentyabr 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Düyünlənən liflərinə

bir tənəyin inadı ki,

sədaqət andı içib,

Bir-birindən ayrılmağa

ancaq bıçaq inandırar

meynə budaqlarını..

Sən burduqca, burulduqca

üz-gözünə salxım-salxım,

gilə-gilə tökülərlər..

(sentyabr 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Zər atırlar..

Zər atırlar..

Xeyir deyib

şər atırlar,

Qara zərlər

ağ daşlara

dəyib gəlir

ovucuma..

Nərdtaxtanın

bu ucundan

o ucuna

heç bir arşın

eləmirsə,

Göyə çıxsın,

yerə girsin

qara başım..

Altı gündə,

altı dəfə

boş hədəfə

ha zər tutum,

ha fənd işlət..

Nəsə bir iş

var bu işdə..

Allah özü

dü şeş gəlir

hər gedişdə..

(sentyabr 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Çəkdi ciyərinə bir qurtum külək,

yığdı qanadını, bükdü köksünə..

Uçmaq...

gecənin dalınca sürünmək kimi,

sərsəri havanın dadına baxmaq...

Ağzında turşumuş arpanın tamı,

Şəhər aşağıda sarı bir qucaq

Küçə işıqları, maşın fəryadı

Şüşə qırıqları, soyuq bir səki..

Hər gün eyni lapa, hər gün eyni dən..

Yeyib ağzınacan doyasan təki..

Tüpürər bu yerin bəlkə üzünə

Bilsə, yer üzünün neçə üzü var.. 

Sürüşdü caynağı altından budaq,

buraxdı özünü yerə qaranquş..

Sındı badə kimi çırpılıb yerə..

Bir az da alçaldı şəhərin boyu,

Öyrətdi daşlara boyun əyməyi.

Sındı bir sərxoşun axşam qisməti,

Qaldı boğazında sağlıq deməyi..

Söydü bu dünyanın etibarını..

Söydü həm yoxunu, həm də varını..

Havadan bir tikə yer də boşaldı...

Bircə lələk qaldı asılı göydə

Bir də yaxasından söyüş asıldı..

(sentyabr 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Biri var, biri yox..

Hində cücələr

bu gün biri itir,

sabah biri yox..

Tövlədən qaçanın

xəbər-ətəri,

Özünü asanın

kəndiri yoxdu..

Deyirlər, tülkülər

gediblər həccə

Belə nağıllara

inanmır cücə..

(avqust 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Yoxdu günahlarımdan

arınmadığım gecə..

Başı rahat yastığa

qoyduğum gecə yoxdu..

Hara baxsan qeyb olur

gündüz nigaranlığı

gecə aramlığında..

Gündüz çoxbilmişliyi

gecə avamlığında..

Gündüzün fitnəsindən

gecəyə sığınıram..

Riyadan don geyinmiş

parıltılı səhərdən..

Hər mövzu ətrafında

ürəkdən andiçmələr

Dönər zəqqum zəhərə

gecə etirafında..

Səhər hər vaxt açılar

ağsaqqal simasında,

Bükər həqiqətləri

yalanın arxasında..

Gündüz gülər üzümə,

gecə çökər gözümə.

Bir yalandan ötəri

qəniməm öz-özümə..

(avqust 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Gəlin içək, bu dünyadan

köçənlərin sağlığına..

Ayaqüstə ölənlərin,

ölüb də dirilənlərin..

Göz yaşını şərab edib

dərd üstünə dərd calayan,

Gileyini ürəyində

gizli-gizli parçalayan,

Bu ömrün hər yoxuşunu

gülə-gülə

keçənlərin sağlığına..

Bələyi də, kəfəni də

eyni bezdən

biçənlərin sağlığına..

Gölüm var, dənizim yoxdu,

Sizin vardı, bizim yoxdu,

Hər tikədə gözüm yoxdu,

Üçdən-beşdən nə var əziz?

Elə üç var, beşdən təmiz..

Gəlin içək, üçü beşə

seçənlərin sağlığına..

Gəlin içək.. gəlin içək

içənlərin sağlığına..

(iyul 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Üç taxtadan keçir yol :

Beşik, əsa, tabutdan..

Beşik sındı, boy atdı,

Süddən kəsilən ağız

əvvəl aşa dadandı,

sonra daşa dirəndi..

Göz dikdiyim tikələr

bir ovuc quma döndü,

ələndi qarış-qarış..

Torpaq altında qurd-quş,

torpaq üstdə dörd divar

arasında can qovur,

hər yetən bir ad qoyur..

Yol dolandı, iz itdi,

Göydən düşən üç alma

görən kimə qismətdi?

Köç yığıldı dərədən,

Hürkən qaçdı bərədən,

Dövran keçdi bəridən..

Bulaq üstdə gəlinlər

səhəngini doldurdu,

Bir igidin ömrünü

göz ucuyla soldurdu..

Göy otları biçdilər,

Yazda doğan quzular

payız vaxtı şişlərə,

köz üstünə keçdilər..

Çay daşları yumruca,

Sel gələndə səslənər,

Bizim dağın dumanı

yatağında bəslənər..

Bu dördkünclü dünyada

yüz qapıdan ötdülər,

Axırıncı mənzildə

başdaşına yetdilər..

Yarpaq düşdü budaqdan,

Yel sovurdu, apardı,

Ocaqdakı sonuncu

od-alovu qopardı..

Gen dünyanı dar edən,

Yorulmadan yel qovan

qara yerdə dincəldi.

Bir günlük qonaq idi,

Göy guruldadı, gəldi..

(iyun 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Döyür dörd yanımı quduz bir liman,

Boğulur gəmilər bathabatımda..

Keçirib boynuma qırmağın zaman,

Gah suyun üzündə, gah da altında..

Ölüm pəncəsində,

gah da həyatın

boğaza dirənən işgəncəsində...

Ovcumda çırpınan yaralı quşun

dimdiyi qanlıdır, caynağı təşnə..

Yollarda qurd-quşla qohum olmuşuq,

yollar yırtıcıyla doluymuş, demə!

Qıvrılıb qoynumda qara ilanlar,

Zəhərin dadına öyrəşib dilim..

Çörəyim daşdandı, suyum yağışdan..

Diri basdırılmış ölülər kimi

gah torpaq üstündə, gah torpaq altda..

Ölüm pəncəsində,

gah da həyatın

boğaza dirənən işgəncəsində…

Torpağın qarnına düşən toxumam,

Cücərib çıxmağa heyim qalmayıb.

Yüküm elə ağır, özüm elə xam!

Bilməm, nəyim qalıb, nəyim qalmayıb?

Şəhərlər dar gəlib gen ürəyimə,

Dərdi yükləmişəm yorğun buluda,

Yusifdən yan keçən, bizdən xəbərsiz

Ümidlər can verib dilsiz quyuda.

Alnımın təriylə gözümün yaşı

Dəyməz bu dünyanın quru xərcinə

Ömrün uzunluğun ölçüb arşınım:

Ana qucağından kəndir ucuna..

Gah əl üstündəyəm, gah ayaq altda..

Ölüm pəncəsində,

gah da həyatın

boğaza dirənən işgəncəsində...

(may 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Düşən qor kökündən alışdı dildə,

Alovu yellərə calamaq olmur..

Ürək uşaq deyil iyirmi birdə,

İndi əvvəlkitək dolamaq olmur..

Cibdə davasıdır çörəyin, aşın,

Məqamsız təşvişin, vaxtsız təlaşın,

Ömrün baharını ötəndə yaşın

Solan güllərini sulamaq olmur..

Günəşdən hər axşam, aydan hər səhər

Günləri borc alıb ödə birtəhər!

İlişir boğazdan aşağı qəhər

Ürəyi qəhərə bulamaq olmur..

Yandır kötükləri dönüncə külə,

Yandır, bir də çətin yanıb tökülə..

Siqaret deyil ki, dərd də çəkilə

Onu tütün kimi qalamaq olmur..

Düşüb bir oğlundan asiman uzaq,

Biz oynamamışıq, biz də uduzaq,

Hürür çoban iti, susur yalquzaq

İt hürən tərəfə ulamaq olmur..

(may 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Şoranlıqda güllər əkdim,

Suladım torpaq doyunca

Küləklərdən, şaxtalardan

qoruyunca

həlak oldum..

O gün ki hürrü-pak oldum,

Xırda-xırda toxum sayaq

əkildim gül kimi yerə..

Götürmədi şoran torpaq..

Güllər açdı, mən açmadım..

Oynamayan xonçalara

düşdü gülün qönçələri..

Güllər yad əllərdə gəldi

ziyarətə

Cərgə-cərgə düzüldülər

ziyafətə..

Yaman düşdük

torpağın da ac vaxtına..

Azdı itim qaranlıqda,

şoranlıqda..

Şoranlıqda güllər əkdim,

Suladım torpaq doyunca

Küləklərdən, şaxtalardan

qoruyunca

həlak oldum..

(may 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Kənd uzanır dəmir yolu boyunca,

Bir cığır da gediş-gəliş izlərindən

yağış yağıb, su yığılıb, açılıb.

Bura Qədirbağıdır..

Hər girəndə bir salavat,

bir fatihə oxuyarıq

Qədir kişinin ruhuna..

Arxasıyca neçə gözün

mayəsini

ağlar qoyub,

Neçə-neçə ailələrə

bağlar qoyub.

Bu bağlarda səndən sonra

nə əkilir, kal yetişir..

İndi hər küncdə, bucaqda

bir qədir bilən gəzirəm.

Qədir bilmək

indi yaman

çətinləşib,

Qədir kişi!

Bir az var ki, dayanmışam

tut ağacının altında..

Dünən burda,

elə indi dayandığım yerdə dünən

bir zəncini maşın vurdu qaranlıqda

Dedilər "sürən görməyib",

"o heç kimi öldürməyib"..

Neynəsin ki, qaranlıqda

seçilmədi üzü-gözü,

zəncinin qara bənizi..

"Nə iti azmışdı onun

gecənin bir vaxtı orda?"

dedi qeyrət keşikçisi..

Dayan.. Yaxşı sualdır bu..

Görən, gecənin bir vaxtı

nə gəzirdi orda zənci?

"Ya bomjdur, ya dilənçi!"

Ortada bir cansız bədən,

bir də şey-şüy.. ətrafında..

Səpələnmişdi hər yerə

qəpik-quruş, əskinaslar..

Aha..

və bu ərəfədə

bir tülkü də duyuq düşdü,

Zənciyə göz gəzdirəndə

nəsə parıltı görmüşdü..

İndi..

İndi..

Ancaq indi fanar yandı,

Gecə sanki aydınlandı,

İşıq düşdü üz-gözünə,

Bir qızıl saat sallandı

meyidin yırtıq cibindən..

(yanvar 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Şərin xeyri ram etdiyi,

gəbərtdiyi bir vaxtda

yuxun çəkilibsə ərşə,

səni yatmağa qoymayan

hər nədirsə, düş izinə, çıx küçəyə !

Qoşul qarovulçulara,

dağda ulaşan itlərə..

Marıtdıyıb sənə baxan

bir cüt gözdən, ya nəfəsdən

hürkən olma, hürküdən ol !

Tutub cırıq yaxasından

yar gecənin bağrını !

Azan səsi güdənlərin

daşırt səbir kasasını..

Salıb yerə niqabların

küləklərlə hesablaş,

salıb yerə bu göylərin

parıldayan tacını,

ulduz hakimiyyətini

devirməyə hazırlaş!

Al əlindən İsrafilin şeypurunu,

hüzünlü bir nəğmə oxu, od üfür !

Sübhü sürüyə-sürüyə

saçından tutub gətir!

Qaldır başın,

qoy üzünə baxsın onu kim doğur..

(yanvar 2026, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

İşığın çoxluğundan

kor olmuşdu gözlərim?

Ya elə həmin korluq

görməyin özü idi?

Görmək nədir ki guya?

Bir cüt gözdür, ya işıq?

Görən gözdürsə əgər,

o gün Yanıq Kərəmi

necə çaldı kor aşıq?

Söz necə dilə gəldi?

Ya saz necə mələdi?

Ya da ki, hara getdi

“Aşıq çalar gördüyün”?

Sən necə tay tutursan

günün gündüz çağında

əllərində çıraqla itənləri

qaranlıqda özünü tapanlara?

Gedin, deyin, qiyamətin

əlamətin güdənlərə,

Mehdini çağıranlara,

Ki, bu yerdə kimlər görür

kimlər eşidir, bilinmir.

Görüm, ağızları nədir,

buna qiyamət deməsinlər!

(oktyabr 2025, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Bu aləmdə hər mövcudat

Öz yerində qərar tutub

Nə qarışıb xeyir şərə,

Nə şər xeyri üstələyib.

Xeyir əzəldən özünü

Şər olandan kənar tutub.

Dünya öz dünyalığında,

Allah Allahlığındadır.

Fəqət təkcə insan oğlu

Uduzubdur bu alverdə.

Bu ucsuz-bucaqsız yerdə

Nəsə qərar tuta bilmir.

Bircə bizik ki, qalmışıq

İki dağın arasında:

Yamaclarda get-gəl edib

Hər dəfə girinc, müztərib

Elə dırmaşa-dırmaşa

Gah o başa, gah bu başa,

Ya əbədiylə faninin,

Ya varlıq ilə yoxluğun,

Ya yaşayarkən ölməyin,

Ya ölərək yaşamağın arasında..

(avqust 2025, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Nakam arzularım göydən asıldı,

Hər cür məhrəmimə yadlar basıldı,

Bədən silkələndi, ürək sarsıldı

Kor bəxtim oynadı yarış mənimlə

Sevgidə yanıldım, dostda uduzdum,

Hərəsin ağlımda bir yerə yozdum

Öz alın yazımı özüm də pozdum

Küsdü alnımdakı qırış mənimlə

Ömürlük zəhmətim puç, hədər oldu

Sonda mənə qalan bir qədər oldu

Gələnlər qapımdan nöş gedər oldu?

İndi olmadılar tanış mənimlə?

Hər nə yola girdim, duman bağladı,

Hər gedən sinəmi bir də dağladı

Kişilər ağlamaz? bayaq ağladı

Bayaq birgə yağdı yağış mənimlə

Hərçənd, söykənəsi dayağ deyilsən

Sən özümüzküsən, qırağ deyilsən

Küsdün barışırsan, uşağ deyilsən

Barış, ey taleyim, barış mənimlə

(avqust 2025, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦

Salam olsun səhərin ilk işığında

yola düşən yorğun, səssiz addımlara..

Ovucunda xırdalanmış

çörək qırıntılarına..

Təkcə ümidlə isinən

soyuq, dolu otaqlara..

Dərdini bölüşməsə də

gülümsəyən baxışlara..

Ayaqqabısı palçığa batanlara,

başı göydə ulduzlara dəyənlərə..

Salam olsun bir cüt corabı bölüşən

bacı-qardaş səmimiyyətinə..

Şaxtalı bir qış səhəri

avtobus yolu gözləyən

məsum, yuxulu gözlərə..

Salam olsun başqasının

dərdinə qulaq kəsilən qulaqlara..

Bükülməyən beli ilə

taleyin yükün daşıyan çiyinlərə..

Gecənin qaranlığında

göyə ümidlərlə qalxan,

çörəyin daşdan çıxarıb

süfrəsini nurla bəzəyən əllərə..

Bu yoxluqlar dünyasında

varlıqla keçinənlərə..

Və ya, yoxluğu əlində

varlığı qəlblərində daşıyanlara..

Salam olsun, qazanları boş olsa da

evin qonaqsız qoymayan qapılara..

bircə nimdaş paltarını hər bayrama

təzə kimi ütüləyib geyən qürur sahibinə..

Çörəyi duza batırıb

onu belə bayram edən sadəliyə..

Kasıb cibinə sığmayan

zəngin, təmiz ürəklərə

Salam olsun..

(avqust 2025, Bakı)

✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦ ✦